Kolumne

KoebiSchnyder_sw.JPG

SMS von der Alp

Von Jakob Schnyder

Liäbi Läserinnä und Läser.

Damal schribi schu us em Mittlerä. Am letschtä Mittwuch hämmer d Chüä ufäplünderet. Bis ihr das läset, simmer schu ä guäti Wuchä dobä. Chüürzli hami gfraget, obi ächt mit dr modernä Technik schu nümmä Schritt mög haltä. Ha Afang Alpsummer ä nüüers iPhone i Betrib gnu, dasi dä au sicher und zuäverlääsig ad Ziitig schribä chiän. Ich ha dä das Gräät wäred em Holzä im Sagg ka und us unerklärlichä Gründ häts agfangä spinnä. Zerscht hani eifach einzelni Taschtä nümmä chännä truggä. Das hät mi dä afig ä chlä näärsch gmacht, will der Plunder wärfets eim ja schliässli nüd vergäbä hindänachä. Woni dä ä par Tag später vum Mittlerä obäabä gloffä bi, hät plötzli öper gredt i miner Fraggtäschä innä. Ez hät das eländä Lumpägrät agfangä sälber ummätelefoniärä. Öpä zwei drü Mal hani nuch chännä rächzitig abhänggä und z dritt Mal dä ebä nümmä. Ich ha dä sofort mit em Saggmässer d Simchartä usägmännt, gottlos a denä arrogantä Gauner, wo derä Telefon produziäret, gfluächt und schliässli der ganz Plunder sammt allnä Nummerä und Kontäkt am Tüüfel zuä gschmätteret. Na isch lang Funggstilli us Auerä gsi, bis d Muäter ämal äs Taschtätelefon ufägschiggt hät. Schribä isch würggli müähsam, abr gad sälber ä Pizza uf Auerä ufä bstellä würs dä nämes glich nüd.

Will mä mit sms au Bilder schiggä cha, probiäri ez z erschtä mal äs Foti usem Mittlerä biizleggä, wo nachmä Gwitter ufgnu wordä isch. Logischerwiis nüd vu mim prähistorischä Alpäfunggrät, sondern us mä nüüä Smartphone, wo d Bsitzeri halt nüd ärgeret. Mir wärdet ez nuch guäti zwee Wuchä da im Mittlerä, mim Liäblingsstafel, bliibä und na gahts dä ufä i Oberä. Det obä chumi mir dä widr vor we dr König ufem Dach vu dr Wält. Freu mi uf das Gfühl. ?

Liäbi Grüäss Jakob


Meldung druckenText versendenFenster schliessen