Kolumne

Vunerä Reis ?änä Norwegä

Von Köbi Schnyder

Am 23. Dezämber 2010, Cousin Rolf und ich sind nuch zmitzt i dr Helipilotäusbildig gsi, hämer beschlossä, dasmer zämä weled uf Norwegä. Det heig nämmli einä ä Bell 204, sonä Heli, wemänä us dä Vietnamchriegsfilm känni.
Der mos mä as angehendä Pilot eifach ämal gflogä si. Das sig quasi dr Heli vu dä Helänä. Na dä Fäschttäg gümmer. Dr Arbetskolleg Michel hät sich au zu üserer Rundi gsellt und gmeint, er chäm au mit. Üseri Reisevorbereitigä sind ä churzi Sach gsi. Äs Telefon uf Norwegä zu dem Pilot, wo ä Kollegin uf Änglisch gmacht hät für mich, dr Nachbuur Dani nachem Wäg fragä und am Michel sim Auto rasch Brämsä und Öl wächslä. D Reisebesprächig undr üs drüü isch höchschtens zächä Minutä ggangä. De enorm Erfarig vu üs im Planä vu so Sachä händ sich a diversä Ussagä widerspiäglet we: «Ich het nuch Euro diheimä ...» – «Mit Euro chasch dr ds Füdlä butzä, üserä Schwiizerfranggä wänds uf dr ganzä Wält!» Oder: «Ich kiiä da gläb nuch mini Pischtolä ids Handschuähfach, sicher isch sicher idr Fremdi ...!» «Spintsch! Wänds üs verwütschet, wärfets üs i Kärker mit Wasser und Brot ...!»

Träffpunggt isch am 26. Dezämber am Morgä am eis bim Rolf gsi. Dr Michel isch ä guäti halbstund bi mir vor dr Tür parat gsi und mir händ zämä nuch äs Kaffi trunggä. Am füf vor eis hämer bim Rolf glüütet. Er isch ä chlä überrascht gsi ab üserem früähnä Erschiinä, aber er chäm gad abä, er mös nur nuch schnäll paggä. Am Gloggäschlaag eis znacht simer tatsächli abgfahrä. Churz vor Sargans hät der Erscht dä schu gmeint, es sig gläb nuch ä Chritz uf das Norwegä ufä. Nach öpä änerä guätä Stund Fahrt bin i dä vertschlafä ufem Rüggsitz und erscht irgendwo im Düütschä widr verwachet. Ds Wätter hät sich ordäli verschlächteret und es hät irgendwo i dr Nächi vu Fulda agfangä schniiä. Mir sind numä nuch langsam vorwärts ku und es isch schu bald gägä Mittag ggangä, bis mer uf ds Schiff für änä Dänemark händ chännä verladä. Näbscht üs händs nuch ganzi Iisäbahnwägä i der Stahlkoloss iigladä. De Überfahrt isch losgangä. Mir isch uf See nüd ganz wohl gsi. Trotz all miinä Befürchtigä hämer kei Iisbärg grammt und sind nüd underggangä. Au Dänemark und ds Schiff änä Schwedä hämer hinder üs lu.

Es isch Namittag am viärtel ab viäri gsi und hät schu tungglet. Üseri Fahrt isch wiiter ggangä. Dur ändlosi Wälder und schneebedeggti Landschaftä hät si üs gfüährt. Numä ds Gfindä vumenä Hotel isch i derä Määrliwält ender schwirig gsi. Ich ha üs dä miterä Landchartä i de nächscht Stadt gfüährt. Det hät tatsächli nuch äs Hotel offä ka. Dr Portier hät zwar schu ä chlä komisch gluäget, wo da drii Schwiizer z Nacht am zächni mit Hunger nuch äs Zimmer und z ässä händ wellä. Aber mir händ tip top gspisä und au gschlafä. Nachem Zmorgä simer dä wiiter richtig Norwegä ä üserem Heli entgägä. Es isch voräwäg zächni am Morgä wordä, bises tägelet hät, so wiit obä im Nordä. Dr Zmittag hämer schu z Norwegä ggässä. Und ich hami dä gwunderet, dass ä Chübel Biär um-ggrächnet zwölf Franggä choschtet. Mä häts ja dä mösä i Kronen oder Euro zahlä. Nächschtä Halt isch Bergen gsi. Ä wunderbari Stadt. Vu det us wärs nuch öppä ä Tagesreis bis zum Heli. Der isch imnä Dorf am Ändi vumnä Fjord gstandä. Immer am Morgä am nüüni fahri ä Fährä hinderä, aber es gäb au nuch ä Alpäpass a ds Ziil. Üseri Nachforschigä händ aber ergii, dases ä wiitä Cheib müäs sii det hinderä, drum nämemer ds Schiff. Nachemnä Tag z Bergen und änerä chliinä Wanderig im Schnee det simer ufä Wäg richtig Ziil. Am Folgetag nacherä durchzechtä Nacht simer am Punggt zächä ab nüni am Hafä gsi und händ ds Schiff gse drvu fahrä. Päch ka. Mir nänd glich dr Pass, d Ziit langet ja nuch. Mir sind gfahrä und gfahrä über verschniiti Alpä dur Gägendä, wo der Aschii gmacht händ, as wäret schu sit Ewigkeitä kei Lüüt me det gsi. Es hät ä Stellä Schnee det obä ka. Irgendwo hät ä Wägwiiser verratä, dases nuch 27 Kilometer i das Dorf möset si. Mir händ üs i Gedanggä schu am Stüür vu dem Bell 204 gseh und d Vorfreud isch immer meh gstigä.

Plötzli stümer vorerä gschlossnä Barrierä. Ich ha mit mim Wörterbüächli eis Wort chännä übersetzä «Lawinengefahr». D Stimmig a Bord vu üserem Reisemobil isch sofort ufnä Tüüfpunggt gsunggä. D Träum sind platzt. Mir wärdet dr Heli niä flüügä. Ä anderä hät numä nuch zwee Zigarettä im Päggli ka und d Triibstoffresärvä im Kofferruum sind uf zächä Liter zrugggangä. Mir händ dä i derä Enttüschig das Ganzä abblasä, dr Göppel kehrt und eifach numä nuch hei wellä. Üs isch bewusst gsi, dass üserä Heiwäg mindestens 30 Stund gaht. Aber das hät niämert interessiärt im sälbä Momänt. Mir sind unverrichteter Dinge ufä Heiwäg.

Minä Tipp nach denä Feriä a alli Reisendä, dönd ücheri Usflüg besser planä as es mir duä gmacht händ. Ds Fazit im Nachhinein: Üseri Spontanität hät üs allnä drüü eini vu dä schünschtä und lüschtigschtä Reisä i üserem Läbä beschäärt und keinä, weder dr Michel, dr Rolf oder ich sind jemals mitemnä Bell 204 gflogä.

 


Meldung druckenText versendenFenster schliessen