Rubrik: Kolumne

SMS von der Alp

Jakob Schnyder nimmt uns mit in seine kleine Welt und lässt uns auch diese Woche wieder am Alpsommer auf Aueren per SMS teilhaben.

Liäbi Läserinnä und Läser

Näbscht das ä kä «Glarner Wuchä» chu isch am Mittwuch, hät mä nämä nüd vil mitüberchu vum erschtä Augschtä. D Wiggisfüürer sind ganz ent­tüüscht über d Plattä i Oberä abä chu zum Kafi. Si heiget z Holz mösä versorgä, es gäb käs Füür am Nationalfiirtig! Ich glaubä, am wenigschtä truurig über das Verbot sind üser ­Huustiär gsi!
Üsers Lehrmeitli isch ändi Munet au fertig wordä bi üs und mit mä lachendä und mä böögendä Aug drabä parat fürä nächschtä Schritt i sim ­Läbä. A sinerä stell isch ä jungä Buurscht chu, wo dr Zivildiänscht änä Auerä leischtet. Er isch keinä vum Fach, abr ä Friinä und Fliisigä! Einä, womä mit Freud au mal ä Arbet ä zweits odr dritts Mal erchlärt, falls es dä überhaupt nöötig würd. Bis hänä chani der Alpsummer eigentli lobä. Dases ä trochnä Cheib isch, das hämmer mittlerwiilä all gmerggt und am Wätter ummächiänä hät raati nuch niä öpis gnützt! Abr wills immer trochä isch hämmer zum Bispil nuch niä problem mit dä Chlauä (Füäss vu dä Chüä) ka. Es wachset zwar fascht kä Gras me nachä, abr das wo isch stampfets vil weniger zämä as zum Bispil fääret wos ä nassä Cheib gsi isch!
Mir hoffet ez bis zum nächschtä SMS gliich öpä uf äs par Tröpfä Rägä und wäner bi ücherä nächschtä Wanderig zuäfellig ä Älpler gsänd irgend i dä Underhosä öpis um nä Zuustud ummäturnä, mönder nüd gad am Toggter brichtä – es wird ä verzwiifletä Rägätanz si.

Liäbi Grüäss us Auerä
Jakob Schnyder

zurück - Druckversion