Kolumne

Vu Lüügägschichtä und Briäfchäschtä

Köbi Schnyder, Älpler und Schlosser mit seiner neuesten Kolumne in der "Glarner Woche".

Us guätem Elterähuus hämmer glernet, das eim dr Samichlaus bestrafft wämä lüügt. Trotzdem verzellt jedä Mäntsch mängmal Gschichtä, wo nüd ganz ä dr Wahrheit trüü sind und wänn einä phauptet, er machi das niä, hät er warschindli au gad glogä.
Lüügä sind i dr Gschicht schu ä huufä vorchu, we Bispil vum ehemaligä DDR Staatsvorsitzendä Walter Ulbricht oder am US-Presidänt Bill Clinton zeiget. I derä Kolumnä gaz ämal um nä Uwahrheit vu miner siitä, womer usdänggt ha, zum nä Buuherr vu dr Montage vumnä faltsch gliferetä Briäfchaschtä z’überzüügä. Ich wett da im vorherein nuch afüägä, dasi so öpis na niä me gmacht ha.
Ich ha vor mängem Jahr ämal äm nä Friitig Namitag dr Uftrag vum Chef überchu, zum iz Zürioberland z fahrä und ä Briäfchaschtä änerä nüüä Villa z montiärä. Am zwei sig dr Buuleiter vor Ort und bringi der Chaschtä mit und mir chämet nä zämä hänä machä. Ich hami dä nachem Zmittag mit Wärchzüüg und Pfiifä iz Auto ghöggt und der Usflug gstartet. Ufem wäg nuch ä churzä Halt bim Sprützwärch, wo das drvor vu mir gschlosseretä Füässli und z Hüüsli zu dem Briäfchaschtä inerä schünä Farb parat glägä sind. Es hät mi schu chlä varuggt dunggt, dasi ez wägä somä Chäschtli sowiit fahrä muäs, hami dä aber trööschtet, dases ja Lüüt gäb, wo iz Düütschä usä fahred, will det dr Servelat ä zwänzger billiger isch as vor dr Huustüür und eigentli isches ja ä ringä Fritig Namitag für mich. Am Ziilort achu, hät mi dr Buuleiter schu erwartet.
As erschts mösemer dr provisorisch Briäfchaschtä äwäg ni. Ich bi ä chlä verdutzt gsi, will das angeblichä Provisorium ä nüüerä Alumi­nium-Norm­briäf­chasch­tä vum nä Nam­haftä Schwiizer Produzänt gsi isch. Aso alles anderä as ä billigs Gfozz wo nach mä halbä Jahr z Törli abähanget und z Namätäfäli am Pöschtler sim Töfflirad chläbet.
Jä nu, er will ez halt ä anderä und zahlt das sicher au. Z ganzä Awesä hät mi sowiso erahnä lu, das de Buuherrschaft wahrschindli ihres Gäld nüd mit Biggel und Schuuflä im Tunnelbuu hät mösä verdiänä. Mir egal, ich ha ez schliässli minä Zahltag hüt Namitag vu ihnä. Mir händ dä das Provisorium äwäg und mis nüüä Füässli und z chlinä Blächhüüsli agschruubet. Na hämmer zämä de Schachtlä mit em nüüä, i dr Farb vu minä Schlosserteili und em Gartätörli laggiärtä Postfach uftuä. I dem Momänt isch am Buuleiter dr Ladä abä. Ä anders Grau… Sofort hami vergwüsseret, wo dr Fähler liit. Schwein ka. Mini gliferet Konstruktion passt optisch zum Törli und dr Huusfassadä.
Mini milderndä Wort, we: «der Unterschied gset mä ja kuum» – und – «d Rächnigä chämet trotzdem», händ nüüt me gnützt. Dr Buuherr mös das sälber aluägä. Dr sälb isch chu und hät dä nach langer Fählersuächi entschidä, er well der Chaschtä i gnau derä Farb we dr Räschtä. Dr Gedanggä, dasi ez tatsächli für d Füchs da abä gfahrä sig und nüd extra nuchämal well chu, hät mi zu anderä Massnahmä tribä. Dä hani zu denä zwe eher herablassend würggendä Mannä gseit, ich well nä ez ämal ä Gschicht verzellä. Diheimä hani ä jungi Frau und drüü chlini Chind. Zwei Meitäli und ä Buäb. Mir wohnet im nä Reiähüüsli änä Netschtl, womer vor äs paar Jahr händ chännä chaufä. Vor üserer Huustüür heigs natürli au ä Briäfchaschtä, ä altä und er hät afig öpä ä Büülä zwee. Abr ä zwäggmässigä. Ich ha miner Frau versprochä, dass wänn d Rappä ämal langet, mir ä nüüä hänä täget. Bis hänä heigemer wichtigeri Pendänzä z zahlä ka. D Frau dot nä drfür am Früählig amigs schmüggä mit allerlei schüünä Blüämli und mit ä huufä Phantasie baschtletä Sachä. Üserä Briäfträger hät jedesmal freud wäner am morgä das gsächi und mit ihrä und üserni Chind äs paar Wort wächsli. Es spillt kä Rollä, we der Briäfchaschtä usgset, d Hauptsach isch, das d Rächnigä wo inä chänd möget zahlt wärdä und diä wo drhinder wohnet zfridä und glüggli sind.
De beidä Mannä händ mi mit ä chlä erbärmischt agluäget und dr Buuherr hät na gseit, mir söled ez der Briäfchaschtä hänäschruubä. Wänns nä im Herbst immer nuch stööri, chäm mä nä dä immer nuch wächslä. Dr provisorisch Chaschtä bruucher nümmä, der söli mitni und mit beschtä Grüäss ad Frau und d Chind vor mis Hüüsli schruubä.
Mich plaget sit duä ä chlä ä schlächts Gwüssä, will sit dem Erläbnis diheimä bi minä Elterä im Chäller, hinderem altä Militärvelo, dä färngstüüretä Auto us Buäbäziitä und minä Ski mit em Prüäfstämpel vu 1997 ä fascht nüüä, abr afig staubigä Briäfchaschtä liit und uf der Momänt wartet, wo mini Gschicht womer da usdänggt ha ämal Wahrheit wird.


Meldung druckenText versendenFenster schliessen